Bakıda belçikalı bəstəkar Antoine Pierrenin master-klassı və mini konserti olub

Müasir Avropa cazının ən dinamik simalarından biri, belçikalı barabançı, bəstəkar və ansambl rəhbəri Antoine Pierre Bakıda olub. O, Azərbaycan Milli Konservatoriyasında master-klass və mini konsert proqramı ilə çıxış edib. Bu tədbir 20-ci Bakı Caz Festivalı çərçivəsində təşkil edilib. Sənətçi gənc musiqiçilərlə təcrübəsini bölüşüb, eyni zamanda öz bəstələrindən nümunələr ifa edib.

Master-klass zamanı barabançı ilk olaraq musiqiyə olan həvəsinin necə yarandığından və anasının bu yolda ona verdiyi dəstəkdən danışıb. Daha sonra o, tələbələrlə birlikdə bir sıra kompozisiyaların struktur məşqlərini həyata keçirib. Musiqiçi tələbələrə ifa etdiyi zaman özünə kənardan qulaq asmağın nə qədər önəmli olduğunu vurğulayıb. Bəstəkar qeyd edib ki, bu yanaşma hər bir sənətçiyə ifasına obyektiv qiymət verməyə imkan yaradır. Onun öz müəllifi olduğu musiqi nömrələrini ifa etməsindən sonra master-klass iştirakçılarla diskussiya şəklində davam etdirilib.

Antoine Pierre müasir caz səhnəsində yenilikçi layihələrin müəllifi kimi tanınır. O, URBEX, URBEX Electric və Next.Ape kimi layihələr yaradıb. Bu işlərdə bəstəkar müasir caz musiqisini rok, elektron və ambient kimi fərqli ünsürlərlə birləşdirir. Onun yaradıcılığı mürəkkəb ritmlər, atmosferik səslər və ənənəvi cazın sərhədlərini aşan melodik ifadə tərzi ilə seçilir. Bu xüsusiyyətlər onun musiqisini çox fərqli və maraqlı edir.