Bakıda 34 yaşlı kişini öldürüb, meyitini doğrayaraq Ağsuda dağa atan şəxslərin məhkəməsi başlayıb

Bakıda 34 yaşlı İsgəndər Əliyevi qətlə yetirməkdə, daha sonra meyitini hissələrə ayıraraq Ağsu rayonunun dağlıq ərazisinə atmaqda təqsirləndirilən Fazil Feyzullayev və Ülvi Abasovun cinayət işi üzrə məhkəmə prosesinə başlanılıb. Bakı Ağır Cinayətlər Məhkəməsində hakim Elmin Rüstəmovun sədrliyi ilə keçirilən hazırlıq iclasında təqsirləndirilən şəxslərin anket məlumatları dəqiqləşdirilib. Məhkəmə işi baxışa verilib və əsas iclasın tarixi təyin edilib. Bu dəhşətli cinayət işi ilə bağlı baxış iclasının dekabrın 10-da keçirilməsi qərara alınıb. Hadisə böyük rezonans doğurmuşdu, çünki qətl tamah niyyəti ilə törədilib və cinayətin izlərini itirmək üçün qurbanın cəsədi doğranılaraq müxtəlif yerlərə atılmışdı.

Cinayət hadisəsi avqustun 4-də, gecə saat 4 radələrində baş verib. Qeyd edək ki, Nəsimi rayon Prokurorluğuna avqustun 8-də rayon sakini, 1991-ci il təvəllüdlü İsgəndər Əliyevin yaşadığı evdə qətlə yetirilməsi barədə məlumat daxil olmuşdu. Araşdırmalar zamanı müəyyən edildi ki, Fazil Feyzullayev və Ülvi Abasov əvvəlcədən əlbir olublar. Onlar tamah niyyəti ilə birlikdə kirayədə yaşadıqları İsgəndər Əliyevi yatarkən qətlə yetiriblər. Cinayətdən sonra Fazil Feyzullayev meyiti gizlətmək məqsədi ilə onu hissələrə ayırıb. Həmin hissələri sellofan paketlərə yığan Feyzullayev Ağsu rayonuna gedərək onları müxtəlif yerlərə tullayıb.

Faktla bağlı Nəsimi rayon prokurorluğunda Azərbaycan Respublikası Cinayət Məcəlləsinin bir neçə maddəsi ilə cinayət işi başlanılıb. Təqsirləndirilən şəxslərə qarşı 120.2.1 (bir qrup şəxs tərəfindən adam öldürmə), 120.2.5 (tamah məqsədi ilə adam öldürmə), 120.2.9 (köməksiz vəziyyətdə olan adamı öldürmə) və 245-ci (meyit üzərində təhqiredici hərəkət) maddələri irəli sürülüb. Toplanan sübutlar əsasında Fazil Feyzullayev və Ülvi Abasov təqsirləndirilən şəxs qismində cəlb edildilər. İstintaq orqanının vəsatəti əsasında məhkəmənin qərarı ilə hər iki şəxs barəsində həbs qətimkan tədbiri seçilib.