“Aztelekom” 2 beynəlxalq mükafata layiq görüldü

AZCON Holdinq şirkətlər qrupuna daxil olan “Aztelekom” MMC, telekommunikasiya və rəqəmsal inkişaf sahəsindəki uğurlu işlərinə görə iki mötəbər beynəlxalq mükafata layiq görüldü. Şirkət genişzolaqlı internet xidmətlərinin regionlarda yayılması, internet sürətinin artırılması və şəbəkə texnologiyalarının təkmilləşdirilməsi sayəsində bu böyük nailiyyətləri qazanıb. Bu mükafatlar “Aztelekom”un ölkənin rəqəmsal gələcəyinə verdiyi töhfəni və beynəlxalq səviyyədə artan ictimai nüfuzunu göstərir.

Mükafatlardan birincisi Parisdə təşkil edilmiş Beynəlxalq Konqres çərçivəsində təqdim edildi. Burada Ümumdünya Genişzolaqlı Əlaqə Assosiasiyası (WBBA) “Aztelekom”u “Broadband for Digital Inclusion Excellence” mükafatı ilə təltif etdi. Bu təqdir, şirkətin internet xidmətlərinə bərabər çıxış imkanları yaratmasına, genişzolaqlı bağlantının regionlara çatdırılmasına və rəqəmsal bərabərliyi təmin etməsinə görə verilib. GPON (Giqabit Tutumlu Passiv Optik Şəbəkə) texnologiyasının geniş istifadəsi, internetin sürətinin və xidmət keyfiyyətinin yüksəldilməsi bu rəqəmsal inklüziya uğurunun əsasını təşkil edir.

Şirkət eyni zamanda texniki sahədəki nailiyyətləri ilə də tanınıb. “Aztelekom” “HUAWEI Product Line” tərəfindən təqdim edilən “Best Practice of Net 5.5G Converged IP Network” mükafatına layiq görüldü. “IPv6 Forum” tərəfindən təsdiqlənən bu mükafat, şirkətin 400GE interkonnekt texnologiyasından istifadə etməkdə, şəbəkənin avtomatlaşdırılmasında və əməliyyat səmərəliliyini artırmaqda qabaqcıl rolunu təsdiqləyir. Bu iki beynəlxalq mükafat, “Aztelekom”un Azərbaycanın rəqəmsal transformasiyası yolunda aparıcı mövqeyini göstərir. Şirkət bundan sonra da genişzolaqlı internet xidmətlərini daha əlçatan etmək üçün fəaliyyətlərini davam etdirəcək.