“AzərEnerji” Energetiklər Günü ilə bağlı silsilə tədbirlər keçirib (FOTO)

“AzərEnerji” ASC Energetiklər Günü münasibətilə ölkə daxilində silsilə tədbirlər keçirib. Rəsmi bayram tədbirləri ərəfəsində Energetika Nazirliyi, “AzərEnerji” ASC və “Azərişıq” ASC-nin rəhbərliyi və kollektivi əvvəlcə Fəxri Xiyabana gəldi. Onlar burada xalqımızın ümummilli lideri, müasir müstəqil dövlətin memarı və qurucusu Heydər Əliyevin xatirəsini ehtiramla yad edib, məzarı önünə əklil və gül dəstələri qoydular. Ziyarətçilər daha sonra Şəhidlər Xiyabanına baş çəkərək, Azərbaycanın müstəqilliyi və ərazi bütövlüyü uğrunda canlarını qurban verən Vətən övladlarının xatirəsini andılar.

Əsas bayram mərasimi “AzərEnerji” ASC-nin Baş idarəetmə, elm, tədris və laboratoriya kompleksində davam etdi. Artıq 21 ildir ki, 20 oktyabr tarixi “Energetiklər Günü” kimi qeyd olunur. Bu peşə bayramı Prezident İlham Əliyevin 2004-cü il tarixli Sərəncamı ilə təsis edilib. Tarixin məhz bu günə təsadüf etməsi əhəmiyyətlidir, çünki 1981-ci il oktyabrın 20-də Ulu Öndər Heydər Əliyevin təşəbbüsü ilə Cənubi Qafqazın ilk böyük istilik elektrik stansiyası olan “Azərbaycan” İES-in birinci enerji bloku istifadəyə verilmişdi. Qeyd edək ki, bu il həm də “AzərEnerji”nin yaranmasının 90 illiyi qeyd olunur. Tədbir Dövlət Himninin səsləndirilməsi ilə başladı, ardınca “İşıqla yazılan tarix” adlı film göstərildi.

“AzərEnerji” ASC-nin İdarə Heyətinin sədri Baba Rzayev çıxış edərək energetika sektorunda həyata keçirilən genişmiqyaslı işlər barədə məlumat verdi. O bildirdi ki, Prezident İlham Əliyevin daim diqqət və qayğısı ilə əhatələnən bu sahədə ciddi irəliləyişlər var. Prezidentin balanslı şəkildə ənənəvi və “yaşıl enerji” mənbələrinə əsaslanan strategiyasına uyğun olaraq, son 20 ildə 5400 MVt gücündə yeni generasiya mənbələri yaradılıb. Sədr vurğuladı ki, təkcə son 5-6 ildə istifadəyə verilən yeni stansiyaların ümumi gücü 3000 MVt-dan artıqdır. Baba Rzayev həmçinin əlavə etdi ki, Azərbaycan elektroenergetikası bu gün regionda bir çox inkişaf etmiş ölkələr üçün nümunə göstəriləcək səviyyəyə çatıb. Bu, Prezident İlham Əliyevin düşünülmüş enerji strategiyasının bariz nümunəsidir.

Səmərəliliklə bağlı mühüm göstəricilər əldə edilib. Son illərdə görülən tədbirlər nəticəsində 1 kilovat-saat elektrik enerjisinin istehsalı üçün sərf olunan şərti yanacağın miqdarı 284 qramdan 240 qrama endirildi. Baba Rzayev bu yolla 3,3 milyard kubmetr təbii qaza qənaət edildiyini və 6,4 milyon ton karbon qazının atmosferə atılmasının qarşısının alındığını qeyd etdi. “Energetiklər Günü” ilə bağlı tədbirlər Bakı ilə məhdudlaşmayıb, regionları da əhatə etdi. “AzərEnerji” tərəfindən ölkənin ən böyük yarımstansiyası olan 500/330 kV-luq “Nəvahi Yaşıl Enerji Qovşağı” ərazisində ağacəkmə aksiyası təşkil olundu. Bundan əlavə, Naxçıvan Muxtar Respublikası, Qarabağ Regional Elektrik Şəbəkəsi və Mingəçevir daxil olmaqla fərqli bölgələrdə də bayram tədbirləri keçirildi.