Azərbaycanda enerji ehtiyatlarının hasilat və ixracat infrastrukturunun inkişafı makroiqtisadi dayanıqlılıq formalaşdırır - BCG

“Boston Consulting Group”un (BCG) hesabatına görə, Azərbaycanda enerji ehtiyatlarının hasilat və ixracat infrastrukturlarının inkişafı ölkənin makroiqtisadi dayanıqlılığını formalaşdırır. Azərbaycan iqtisadiyyatının möhkəm enerji təməli var. Neft-qaz sektoru 2024-cü ilə olan vəziyyətə görə ÜDM-in təxminən 30 faizini təmin edir. Bu sahə həm büdcə sabitliyinin təminatçısıdır, həm də iqtisadi artımın əsas mənbəyi olaraq qalır. Sektor son on ildə sənayeyə yönələn xarici investisiyaların 80 faizindən çoxunu cəlb edib.

İnkişaf etmiş hasilat və ixrac infrastrukturu, eləcə də suveren fondun toplanmış ehtiyatları makroiqtisadi sabitliyi yaradır. Bu vəziyyət ənənəvi sahələrin modernləşdirilməsi və yeni sektorların inkişafı üçün imkanlar verir. Ölkə yüksək səviyyədə xarici iqtisadi fəallıq nümayiş etdirir. Lakin hesabatda qeyd edilir ki, Azərbaycanın ixrac səbəti hələ də həddindən artıq cəmlənmiş vəziyyətdədir: ixracın təxminən 90 faizi enerji resurslarının payına düşür.

Həmçinin, bu enerji resurslarının təxminən yarısı yalnız İtaliyaya göndərilir. BCG analitikləri bildirirlər ki, Azərbaycan Cənubi Avropaya qazın mühüm alternativ tədarükçüsüdür. Azərbaycanın Avropa İttifaqının enerji təhlükəsizliyinin təminindəki rolu blok ölkələrini əməkdaşlığı daha da genişləndirməyə həvəsləndirir. Bununla belə, mühüm xarici iqtisadi tərəfdaşların sayının məhdud olması müəyyən risklər yaradır.

Bu risklərin idarə edilməsi üçün həm ixracın coğrafiyasının genişləndirilməsi, həm də enerji resurslarının emalı istiqamətində inkişaf yollarını nəzərdən keçirmək məqsədəuyğundur. Bu addımlar ixrac səbətinin şaxələndirilməsinə şərait yaradacaq. Nəticədə, iqtisadiyyatın yeni sektorlarının formalaşması təmin ediləcək və ölkənin xarici iqtisadi dayanıqlığı möhkəmlənəcək.