Azərbaycan və Türkiyə bir-birinin vətəndaşları üçün sığorta xidmətlərini qarşılıqlı tanıyacaq - EKSKLÜZİV

Azərbaycan və Türkiyə arasında səyahət sığortası xidmətlərinin qarşılıqlı tanınması sistemi qurulur. Bu yeni yanaşma sayəsində, Türkiyədə sığorta polisi alan bir vətəndaşın sənədi Azərbaycan xəstəxanaları tərəfindən rəqəmsal şəkildə tanınacaq. Türkiyə Sığorta Birliyinin baş katibi Özgür Obalı bu xüsusda açıqlama verib.

Obalının sözlərinə görə, bu sistem işə düşəndə Türkiyə vətəndaşı Azərbaycanda öz ölkəsində sığortalı olduğu kimi tibbi xidmətləri rahatlıqla ala biləcək. Eyni qayda Azərbaycan vətəndaşlarına da aid ediləcək, onlar Türkiyəyə getdikdə bu imkandan yararlanacaqlar. Hazırda əcnəbi vətəndaşlar qəza və ya tibbi zərurət zamanı xərcləri əvvəlcə öz ciblərindən ödəyirlər. Yalnız ölkəsinə qayıdandan sonra sənədləri təqdim edərək kompensasiya ala bilirlər. Yeni yanaşma isə vətəndaşın dərhal xidmət almasını mümkün edəcək. Bu, sığorta sistemində ən böyük dəyişikliklərdən biri hesab edilir.

Özgür Obalı bu inteqrasiyanın reallaşması üçün iki əsas addımın gərəkli olduğunu vurğulayıb. Birinci addım məlumat mübadiləsi, ikincisi isə tənzimləyici orqanlar arasında uyğunlaşmanın yaradılmasıdır. Bu şərtlər yerinə yetiriləndə vətəndaş məmnuniyyəti xeyli artacaq.

Baş katib bildirib ki, Azərbaycan tərəfi elektron sənəd dövriyyəsi üzrə prosesi demək olar ki, tamamlayıb. Həmçinin, pasportsuz kimlik keçidlərindən sonra iki ölkənin e-gov sistemlərinin inteqrasiyası istiqamətində ciddi irəliləyişlər əldə olunub. Sığorta bu böyük inteqrasiya prosesinin mühüm hissəsinə çevrilə bilər.

Artıq bir ilə yaxındır ki, Azərbaycan və Türkiyə arasında dövlət portallarının (e-gov) inteqrasiyası istiqamətində işlər görülür. Bu işlər sənəd dövriyyəsindən tutmuş, vətəndaşların şəxsiyyət vəsiqəsi ilə dövlət xidmətlərindən istifadəsinə qədər bir çox sahəni əhatə edir. Nəticədə həm Azərbaycan, həm də Türkiyə vətəndaşları qarşı tərəfin dövlət xidmətlərindən daha rahat şəkildə istifadə edə biləcəklər. Azərbaycan və Türkiyə arasında sığorta xidmətlərinin tanınması isə Türk dövlətləri miqyasında vahid sığorta ekosisteminin yaradılmasına zəmin yaradacaq.