Azərbaycan və İsrail arasında iqtisadi tərəfdaşlığın genişləndirilməsi müzakirə edilib

Azərbaycan və İsrail iqtisadi tərəfdaşlığın genişləndirilməsi və birgə strateji layihələrin gələcəyini müzakirə ediblər. Azərbaycanın iqtisadiyyat naziri Mikayıl Cabbarov İsrail Dövlətinə işgüzar səfəri çərçivəsində bu ölkənin xarici işlər naziri Qideon Saar ilə görüşüb.

Nazir Mikayıl Cabbarov görüşdən sonra verdiyi məlumatda, Azərbaycan-İsrail iqtisadi münasibətlərinin genişləndirilməsi məsələlərinə toxunulduğunu bildirib. Tərəflər həmçinin birgə strateji layihələrin region və hər iki ölkə üçün perspektivlərini qiymətləndiriblər.

Cabbarov Azərbaycanın beynəlxalq əlaqələrdəki əhəmiyyətli rolunu xüsusi qeyd etdi. O vurğulayıb ki, ölkə əlverişli geoiqtisadi mövqeyə malikdir və qlobal ticarətdə artan tranzit potensialı nümayiş etdirir. Bu amillər iki dövlət arasındakı əməkdaşlığın inkişafı üçün mühüm zəmin yaradır.