Azərbaycan və AYİB su təchizatı və tullantıların idarə olunması layihələrini müzakirə edib

Azərbaycan və Avropa Yenidənqurma və İnkişaf Bankı (AYİB) Gəncə şəhərində su təchizatı və tullantıların idarə olunması layihələri üzrə danışıqlar aparıblar. İqtisadiyyat nazirinin müşaviri Əsgər Ələkbərov bu barədə öz sosial şəbəkə hesabında paylaşım edib. Görüşdə Gəncə şəhərində bərk məişət tullantılarının idarə olunması və su təchizatı sahəsində görülən işlərin cari vəziyyəti ilə yanaşı, gələcək fəaliyyət planları da müzakirə predmeti olub.

Onlayn formatda baş tutan bu görüşdə Azərbaijan İnvestisiya Şirkətindən (AİŞ) olan həmkarlar da iştirak edib. Tərəflər Avropa Yenidənqurma və İnkişaf Bankının Azərbaycandakı Daimi Nümayəndəliyinin rəhbəri Natali Mouravidze ilə danışıqlar keçirib. Müzakirələr AYİB-in “Yaşıl Şəhərlər” proqramının üzvü olan Gəncə şəhərində su və tullantı idarəetmə sistemlərinin təkmilləşdirilməsinə yönəlmiş layihələri əhatə edib. Görüşdə həmçinin Azərbaycandakı bütün su təchizatı və bərk məişət tullantılarının idarə olunması layihələrinin icra vəziyyəti detallı şəkildə nəzərdən keçirilib.

Görüş zamanı şəhərin su infrastrukturunun, təchizat səmərəliliyinin və tullantıların idarə olunması sistemlərinin yaxşılaşdırılmasına yönələn təşəbbüslər əsas müzakirə mövzusu oldu. Bu istiqamətlər davamlı kommunal xidmətləri təmin etmək və əhalinin həyat keyfiyyətini artırmaq üçün mühüm əhəmiyyət daşıyır. Paylaşımda, Azərbaycanın iri şəhərlərində infrastrukturun müasirləşdirilməsi istiqamətində göstərdiyi dəstəyə və texniki ekspertizasına görə AYİB-ə təşəkkür ifadə edilib. AYİB-in bu cür layihələrdə iştirakı ölkənin kommunal xidmətlərinin inkişafı üçün lazımlı dəstək verir.