Azərbaycan sığorta sektorunda "Öz müştərini tanı" modeli tətbiq olunacaq

Azərbaycanın sığorta sektorunda "Öz müştərini tanı" (KYC - Know Your Customer) modelinin tətbiqi üzrə fəaliyyətlər davam edir. Bu yeniliklərin əsas məqsədi məsafədən sığorta məhsulları alan istehlakçıların eyniləşdirilməsi prosesini nizamlamaqdır.

Bu məlumatı Azərbaycan Mərkəzi Bankının (AMB) Sığorta fəaliyyətinin tənzimlənməsi departamentinin direktoru Pənah Bənnayev açıqlayıb. O, Bakıda təşkil edilən "Türk Dövlətləri InsurTech Sammiti 2025" tədbirində çıxışı zamanı bildirib ki, istehlakçılar getdikcə sığorta məhsullarını uzaqdan əldə etməyə daha çox meyl edirlər. Bu tendensiya isə şəxsiyyətin düzgün eyniləşdirilməsi məsələlərini aktuallaşdırır.

AMB artıq eyniləşdirməyə əsaslanan məsafədən satış imkanlarının yaradılması və şəxslərin eyniləşdirilməsi üzrə lazımi hüquqi tənzimləmələri həyata keçirir. Pənah Bənnayev qeyd edib ki, bu sistem əslində vahid bir platforma kimi işləyəcək. Bu platformanın yaratdığı əsas üstünlük ondadır ki, sığortaçılar öz müştərilərini bir dəfə eyniləşdirdikdən sonra, digər sığortaçılar həmin müştəriləri əlavə eyniləşdirmə aparmadan tanıya biləcəklər. Bu yanaşma sığorta şirkətləri üçün əməliyyatları sadələşdirəcək və müştərilər üçün prosesi sürətləndirəcək.