Azərbaycan şahmatçısı dünya çempionatında qızıl medal qazanıb (FOTO)

İspaniyada qadın şahmatçılardan ibarət komandalar arasında keçirilən dünya çempionatına yekun vurulub. Bu mötəbər yarış Azərbaycan şahmatı üçün tarixi bir nəticə ilə tamamlandı. Azərbaycan komandası tarixində ilk dəfə dünya çempionatında ikinci yeri tutaraq gümüş medal qazandı. Ümumi komanda uğuru ilə yanaşı, fərdi çıxışda da böyük nailiyyət qeydə alındı.

Komandamız yarışın finalında FIDE yığması ilə qarşılaşdı. Final mübarizəsi iki görüşdən ibarət idi. Hər iki görüşdə FIDE komandası üstünlüyü əldə etdi. Nəticələr müvafiq olaraq 3:1 və 2.5:1.5 oldu. Buna baxmayaraq, Azərbaycan millisi bu çempionatda tarixi gümüş medalı ilə ölkəyə qayıtdı.

Komandanın heyətində ən diqqətçəkən çıxış birinci lövhədə mübarizə aparan Avropa çempionu Ülviyyə Fətəliyevaya məxsus idi. Fətəliyeva çempionat boyunca 10 partiyada iştirak etdi və 6 xal toplamağı bacardı. O, bu göstərici ilə bütün şahmatçıları geridə qoydu. Bu yüksək fərdi nəticəsinə görə Ülviyyə Fətəliyeva fərdi qızıl medala layiq görüldü.

Azərbaycan komandasının heyətində Ülviyyə Fətəliyeva, Gövhər Beydullayeva, Gülnar Məmmədova, Xanım Balacayeva və Ayan Allahverdiyeva mübarizə aparırdılar. Komandanın kapitanı İlahə Qədimova idi. Məşqçilər isə Nicat Abasov və Qədir Hüseynov oldular.