Azərbaycan Kiyevdə keçirilən diplomatik yarmarkada təmsil olunub

Kiyevdə illik "Charity Fair – 2025" Xeyriyyə Diplomatik Yarmarkası keçirilib. Bu tədbir Ukrayna Xarici İşlər Nazirliyinin (XİN) dəstəyi ilə təşkil edildi. Yarmarkanın keçirilməsi Ukrayna Diplomatlarının Həyat yoldaşları Assosiasiyasının rəhbəri, Ukrayna xarici işlər nazirinin həyat yoldaşı Tatyana Sibiqanın təşəbbüsü idi. Ümumilikdə 29 ölkənin diplomatik nümayəndəlikləri öz milli mədəni irsini və adət-ənənələrini təqdim etdi. Azərbaycan da bu önəmli hadisədə Ukraynadakı səfirliyi vasitəsilə təmsil olunub. Diplomatik missiyaların iştirak etdiyi bu yarmarka xeyriyyə məqsədi daşıyırdı.

Azərbaycan stendi milli mətbəx nümunələrini və mədəniyyətini nümayiş etdirməyə həsr edilmişdi. Burada qonaqlara milli suvenirlər, əl işləri və mətbəx nümunələri təqdim olundu. Kiyev sakinləri, qonaqlar və xarici diplomatik nümayəndələr fərqli şirniyyatlar və çaylarla qonaq edildilər. Ukraynanın xarici işlər naziri Andrey Sibiqa və xanımı Tatyana Sibiqa tədbirdə iştirak edərək xarici diplomatik missiyaların və Ukrayna istehsalçılarının stendlərini ziyarət etdilər. Ukrayna XİN başçısı xüsusilə Azərbaycanın milli stendinə baş çəkdi və burada nümayiş olunanlarla maraqlandı.

Xeyriyyə festivalı zamanı hər bir ölkənin mədəniyyəti geniş şəkildə təqdim edildi. Tədbirin ən yaddaqalan məqamlarından biri azərbaycanlıların "Kavkaz" rəqs qrupunun çıxışı oldu. Rəqs qrupunun coşğulu ifası yarmarka iştirakçılarının böyük alqışları ilə qarşılandı. Bu cür beynəlxalq tədbirlər mədəni mübadiləni gücləndirməyə, həmçinin ölkələr arasında diplomatik əlaqələri inkişaf etdirməyə imkan verir.