Azərbaycan gücünü nümayiş etdirən parad həm qələbənin, həm də ordunun modernliyinin təcəssümüdür – hərbi ekspert

Azərbaycanda keçirilən hərbi parad həm Vətən müharibəsindəki qələbənin təntənəsi, həm də ölkənin hərbi gücünün ən müasir nümayişi idi. Bu paradla Azərbaycan bir daha şəhidlərimizə, qazilərimizə və müharibə iştirakçılarına minnətdarlıq hissini göstərdi. Ehtiyatda olan polkovnik, hərbi ekspert Şair Ramaldanov bildirib ki, Zəfərin 5-ci il dönümü ilə bağlı keçirilən paradda Yeni Azərbaycan öz adına layiq, müasir texnika və silah-sursat avadanlığını nümayiş etdirdi. Bu nümayiş Azərbaycanın müharibədən sonrakı gücünü açıqca göstərir, ordunun inkişafını və modernləşdirilməsini əyani şəkildə təqdim edir.

Ekspertin sözlərinə görə, paradın nümayişinin iki əsas məqsədi var. Birinci məqsəd ondan ibarətdir ki, parad xalqa və dostlara Azərbaycanın inkişafını və ordusunun gücünü göstərir. İkincisi isə düşmənlərə verilən bir mesajdır: Azərbaycana yad niyyətlə baxılacağı təqdirdə hansı güclə qarşılaşacaqlarını bilsinlər. Bu nümayiş Azərbaycan ordusunda aparılan islahatların nəticələrini əks etdirir. Bu nəticələr Müzəffər Ali Baş Komandan, Prezident İlham Əliyevin ordu qarşısında qoyduğu və Türkiyə ordu modelinə keçidlə bağlı tapşırıqların yekunudur. Ordumuzun bütün sahələrini əhatə edən bu islahatlar paradda özünü göstərdi. Həm havada, həm də quruda nümayiş olunan bütün texnika, silah və avadanlıq ən yeni modellərdir. Bunlar müasir tələblərə cavab verən dördüncü və dörd plus nəsilə aid silahlar, raketlər, təyyarələr, artilleriya qurğuları və pilotsuz uçuş aparatlarıdır.

Şair Ramaldanov vurğulayır ki, “güclü ordusu olan dövlət güclü dövlətdir” prinsipinə əsaslanaraq, Azərbaycan ordusunun gücünü dövlətimizin gücü kimi qəbul etmək lazımdır. Güclü iqtisadi potensiala malik dövlət güclü ordu qura bilir. Prezident İlham Əliyev dəfələrlə qeyd edib ki, ikili standartların hökm sürdüyü, beynəlxalq qanunların işləmədiyi bir dövrdə güc faktoru önə çıxır. Bu şəraitdə hər bir dövlət kimi Azərbaycan da suverenliyini və maraqlarını qorumaq üçün güclü olmalıdır. Azərbaycanın gücü və Silahlı Qüvvələrin inkişafı ölkəmizi dünyanın 50 ən güclü ordusu sırasına daxil edir. Lakin bu güc heç bir dövlətə qarşı yönəlməyib. Azərbaycanın işğalçı niyyəti yoxdur; ordunun gücü sadəcə özünü qorumaq və regionda sabitliyi təmin etmək məqsədi daşıyır.

Azərbaycan ordusunun bu inkişaf yolunun əsası ümummilli lider Heydər Əliyev tərəfindən qoyulub. O, hakimiyyətə qayıtdıqdan sonra ordu quruculuğunu təşkil edib, Horadiz əməliyyatı kimi uğurlu əməliyyatla düşməni geri atmağa məcbur edib. Onun davamçısı Prezident İlham Əliyev isə ordunu müasir prinsiplər əsasında inkişaf etdirdi və ən yeni silahlarla təchiz etdi. 44 günlük müharibədən əldə edilən təcrübə bu gün kadr hazırlığı proqramlarında və taktiki yanaşmalarda öz əksini tapır. Aprel döyüşləri bu ordunun ilk sınağı idi və uğurlu nəticədən sonra Prezident İlham Əliyev Azərbaycan ordusunun ərazi bütövlüyünü bərpa etməyə qadir olduğunu bildirmişdi. Bu sözlər Vətən müharibəsində təsdiqini tapdı. Prezident müharibədən sonra da demişdi: “Azərbaycan ordusu nə lazımdırsa, onu alacaq.” Beş illik parad da həmin təminatın nəticəsini göstərdi, çünki texnikamızın nümayişi bunun bariz nümunəsi idi.