Azərbaycan BMT-nin Məskunlaşma Assambleyasının "Hər kəs üçün Münasib Mənzil" qətnaməsi üzrə Hökumətlərarası İşçi Qrupunda həmsədr seçilib

Azərbaycan BMT-nin Məskunlaşma Assambleyasının "Hər kəs üçün Münasib Mənzil" qətnaməsi üzrə Açıq Hökumətlərarası İşçi Qrupuna həmsədr seçildi. Bu seçim BMT-nin Məskunlaşma Proqramının ("UN-Habitat") Keniyanın paytaxtı Nayrobidə yerləşən qərargahında keçirilən 2-ci sessiyası ("OEWG-H2") zamanı baş tutdu. 2023-cü ildə qəbul edilmiş müvafiq qətnamə ilə yaradılan bu qrup, beynəlxalq səviyyədə mənzil təminatı məsələlərini tənzimləyir. Büronun digər həmsədri isə Somali seçilib. Hökumətlərarası İşçi Qrupun rəhbərliyindəki bu rol 2025-2026-cı illəri əhatə edəcək. Bundan əvvəl, büroya Keniya və Fransa həmsədrlik edirdi.

Bu İşçi Qrup hər kəs üçün münasib mənzil təminatını gerçəkləşdirmək üçün fəaliyyət göstərir. Qrup, əhalinin təhlükəsiz, dayanıqlı və əlçatan mənzillə təmin olunması məqsədilə qlobal siyasətin formalaşdırılması və tətbiqinin sürətləndirilməsində BMT-nin Məskunlaşma Assambleyasının katibliyi kimi çıxış edir. O, üzv ölkələrin fəaliyyətini əlaqələndirir və tövsiyələr hazırlayır. Büronun həmsədri olmaq, Azərbaycanın qlobal şəhərsalma proseslərindəki iştirakının davam etməsinə xidmət edir. Bu vəzifə eyni zamanda dünyada mənzil təminatı problemlərinin həllinə daha böyük töhfə verməyə imkan yaradacaq.

Bu yüksək post Azərbaycan üçün strateji əhəmiyyət daşıyır. O, 2026-cı il mayın 17-22-də Bakıda "Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri" mövzusunda keçiriləcək Ümumdünya Şəhərsalma Forumunun 13-cü sessiyasının ("WUF13") nəticələri və təşəbbüslərini önə çəkmək üçün vacib bir platformadır. Dayanıqlı şəhərsalma sahəsində ixtisaslaşmış "UN-Habitat" ilə Azərbaycan arasındakı əməkdaşlıq son illərdə sürətlə irəliləyib. Azərbaycan "WUF13"-ə ev sahibliyi etməklə yanaşı, "UN-Habitat" İcraiyyə Şurasının da üzvüdür. Dövlət Şəhərsalma və Arxitektura Komitəsi və ADA Universitetinin mütəxəssisləri "UN-Habitat" tərəfindən hazırlanan "İnsan-mərkəzli Ağıllı Şəhərlər üzrə Beynəlxalq Qaydalar"ı tərtib edən İşçi Qrupa daxildir. Əlavə olaraq, 2023-cü ildə "UN-Habitat"ın Ümumdünya Məskunlaşma Günü ("WHD23") Azərbaycanda qeyd olunub. "UN-Habitat" 2022, 2023 və 2025-ci illərdə baş tutan Azərbaycanın Milli Şəhərsalma forumlarına fəal dəstək göstərib.