Azad edilmiş ərazilərdə ötən ay 783 mina, 6510 PHS aşkarlanıb

Azərbaycanın Minatəmizləmə Agentliyi (ANAMA) işğaldan azad edilmiş ərazilərdə keçirilən əməliyyatların noyabr ayı üzrə hesabatını açıqlayıb. Minatəmizləmə fəaliyyətinə cəlb edilmiş qurumlar bu dövrdə yüzlərlə mina və minlərlə partlamamış hərbi sursat (PHS) aşkar ediblər. Əməliyyatlar nəticəsində 783 mina və 6510 Partlamamış Hərbi Sursat tapılıb.

ANAMA-nın məlumatına görə, aşkar edilən 783 minadan 575 ədədi piyada əleyhinə mina idi. Qalan 208 ədəd isə tank əleyhinə mina təşkil edib. Bu işlər Tərtər, Ağdam, Ağdərə, Laçın, Füzuli, Şuşa, Xocalı, Xankəndi, Kəlbəcər, Xocavənd, Cəbrayıl, Qubadlı və Zəngilan rayonları ərazisində aparılıb.

Minatəmizləmə əməliyyatları həmçinin Qazax rayonunun azad edilmiş kəndlərini- Bağanıs Ayrım, Aşağı Əskipara, Xeyrımlı və Qızılhacılı kəndlərini də əhatə edib. Agentlik bildirir ki, hesabat dövründə ümumilikdə 6.443.9 hektar ərazi mina və PHS-lərdən təmizlənərək təhlükəsiz hala gətirilib.