“Ayaks”ın yarımçıq qalan oyunu başa çatdı

UEFA Çempionlar Liqasının (ÇL) Liqa mərhələsində “Qarabağ”ın növbəti rəqibi olan “Ayaks”, Niderland çempionatında “Qroningen”ə qarşı yarımçıq qalmış ev matçını yekunlaşdırıb. Əvvəlcə bazar günü azarkeşlərin atəşfəşanlıq şousu səbəbindən bu qarşılaşma 5-ci dəqiqədə dayandırılmışdı. Oyun bu gün qaldığı yerdən davam etdirildi və Amsterdam təmsilçisinin 2:0 hesablı qələbəsi ilə başa çatdı.

Matç tamaşaçısız keçirildi, lakin bir istisna var idi. Tribunaya azarkeş qismində yalnız bir nəfərin çıxmasına icazə verilmişdi. Stadiona ağır onkoloji xəstəlikdən əziyyət çəkən Piter adlı azarkeş buraxılıb. “Ayaks”ın qollarını Qodts və Bouvman vurdular. Statistika baxımından üstünlük “Qroningen”də olsa da, qalibiyyəti meydan sahibləri qazandılar. Bu nəticə ilə “Ayaks” turnir cədvəlində 5-ci pilləyə yüksəlib, lakin hazırda liderdən 14 xal geri qalır.

Bu yerli liqa matçının tamamlanması ilə diqqətlər “Ayaks”ın beynəlxalq oyunlarına yönəlir. “Ayaks”ın növbəti əhəmiyyətli qarşılaşması Çempionlar Liqasının 6-cı turu çərçivəsində “Qarabağ”a qarşı olacaq. “Qarabağ” - “Ayaks” matçı dekabrın 10-da Bakıda, Tofiq Bəhramov adına Respublika Stadionunda keçiriləcək. Qarşılaşma yerli vaxtla saat 21:45-də başlayacaq.