Audiovizual Şura "ATV" kanalına xəbərdarlıq edib

Audiovizual Şura (Şura) "ATV" telekanalına rəsmi xəbərdarlıq edib. Bu addım telekanalın hipnoz və bioenerji təsirlərinin müalicəvi xassələrini reklam etməsi ilə əlaqədar atılıb. Şuranın onlayn iclasında bu barədə qərar qəbul edilib. İclasda müzakirə edilən əsas məqam, "ATV" kanalının efirində noyabrın 13-də yayımlanan "Gün ortası" proqramında baş verən hadisə idi.

Müzakirəyə səbəb olan epizodda qonaq qismində dəvət edilmiş şəxs studiyada aparıcının üzərində məsafədən "enerji ötürmə" üsulunu tətbiq edib. Aparıcı seans bitdikdən sonra bu hərəkətləri müsbət qiymətləndirmişdi. Şuranın Audiovizual proqramların monitorinqi və təhlili şöbəsinin mütəxəssisləri bu cür fikirlərin yayılmasını ciddi pozuntu kimi qeydə alıblar. Onlar bildiriblər ki, bu hərəkət "Reklam haqqında" qanunun 29.8-ci maddəsini pozur.

Həmin maddəyə görə, kütləvi müalicəvi seansların, hipnoz metodlarının, psixi və bioenerji təsirlərin müalicəvi xassələrinin reklamına qətiyyən yol verilmir. Şuranın hüquqşünasları qeydə alınmış faktı pozuntu kimi təsdiqləyib. Şura üzvləri kanalın efirində belə bir qanun pozuntusunun ilk dəfə baş verməsini nəzərə alaraq, telekanala yalnız xəbərdarlıq verilməsi barədə razılığa gəliblər.