Argentinada sərnişin qatarının relsdən çıxması nəticəsində 19 nəfər xəsarət alıb

Argentinanın paytaxtı Buenos Ayresdə sərnişin qatarının relsdən çıxması nəticəsində ən azı 19 nəfər xəsarət alıb. Bu hadisə şəhərin Linyers rayonunda baş verib və nəqliyyatda ciddi məhdudiyyətlərə səbəb olub. Hadisə ilə bağlı məlumatı Buenos Ayres Təcili Tibbi Yardım Sisteminin rəhbəri Alberto Kresenti ictimaiyyətə açıqlayıb.

Xəsarət alanlar arasında vəziyyəti ciddi olan yoxdur. Kresentinin sözlərinə görə, zərərçəkənlərdən doqquz nəfər tibbi yardım almaq üçün xəstəxanalara yerləşdirilib. Qalan on nəfərə isə ilkin tibbi yardım elə hadisə yerində göstərilib.

Qəza "Trenes Argentinos" şirkətinin xətti ilə baş verib. Şirkət qatarın relsdən çıxması səbəbindən həmin marşrutda hərəkəti müvəqqəti məhdudlaşdırıb. Hazırda qəzanın dəqiq səbəbləri müəyyən edilməyib. Şirkət bildirir ki, rels təmizləndikdən və müvafiq müayinələr tamamlandıqdan sonra qatar qəzasının səbəbləri rəsmi olaraq açıqlanacaq.