Aralıq dənizində hücuma məruz qalan tankerin 30 heyət üzvü xilas edilib - YENİLƏNİB

Aralıq dənizində Rusiya bayrağı altında hərəkət edən "Arctic Metagaz" tankerinə hücum edilib. Hadisə nəticəsində gəmidə yanğın baş verib, lakin heyət üzvlərinin hamısı sağ-salamat təxliyə olunub. Rusiya Nəqliyyat Nazirliyi bildirir ki, tanker Murmansk limanından çıxaraq beynəlxalq qaydalar çərçivəsində yük daşıyırdı. Xilasetmə əməliyyatı Malta və Rusiyanın müvafiq xidmətlərinin birgə əməkdaşlığı ilə həyata keçirilib. 30 nəfərlik heyətin hamısı Rusiya vətəndaşlarından ibarətdir.

Məlumata görə, hücum Liviya sahillərindən Ukrayna pilotsuz qayıqları vasitəsilə törədilib. Hadisə martın 3-də Maltanın ərazi sularının tam yaxınlığında baş verib. Mayeləşdirilmiş təbii qaz daşıyan "Arctic Metagaz" tankeri hücumdan sonra ciddi zərər görsə də, xilasedicilər vaxtında müdaxilə ediblər. Malta silahlı qüvvələri gəmi heyətini Liviyanın axtarış-xilasetmə zonasında, xüsusi xilasetmə qayığında aşkar edib.

"MarineTraffic" gəmi izləmə platformasının verdiyi məlumata əsasən, gəmi sonuncu dəfə bazar ertəsi günü Malta sahillərində mövqe siqnalı göndərib. Sözügedən gəmi ABŞ və Böyük Britaniyanın tətbiq etdiyi iqtisadi sanksiyalar siyahısında yer alır. Heyət üzvlərinin vəziyyəti hazırda yaxşıdır və hadisənin bütün detalları diqqətlə nəzərdən keçirilir.