“Android” əməliyyat sistemi “iOS”dan daha təhlükəsizdir – “Google”

“Google” şirkəti “YouGov” tədqiqat şirkəti ilə birgə apardığı araşdırmanın nəticələrini elan etdi. Bu araşdırmaya görə, “Android” əməliyyat sistemi ilə işləyən mobil cihaz sahibləri “iPhone” istifadəçilərinə nisbətən virtual dələduzların göndərdiyi SMS-lər və zənglərlə xeyli az qarşılaşırlar. Bu rəqəmlər göstərir ki, Google-un təhlükəsizlik yanaşması rəqiblərinə nisbətən daha yüksək müdafiə səviyyəsi təmin edir.

Sorğudan əvvəlki yeddi günlük müddət ərzində, “Android” istifadəçiləri “iOS” sistemli cihaz sahiblərindən 58 faiz az dələduz mesajlar alıblar. Təhlükəsizliyin ən yüksək səviyyəsini isə “Google Pixel” smartfonları nümayiş etdirib. Bu cihazların sahibləri arasında spam və fişinq tipli mesajlar qəbul etmə riski “iPhone” istifadəçilərinə nisbətən 96 faiz aşağı olub. Üstəlik, “iOS” istifadəçiləri bir həftə ərzində üç və daha çox dələduz SMS alma halları barədə “Android” istifadəçilərindən orta hesabla 65 faiz daha çox məlumat veriblər.

“Google” şirkəti bu müsbət nəticələri bir sıra texnologiyaların tətbiqi ilə əlaqələndirir. Bunlara RCS (Rich Communication Services) protokolu, “Android” sisteminə inteqrasiya olunmuş müdafiə mexanizmləri və süni intellekt əsaslı sistemlər daxildir. Şirkət bu texnologiyaların istifadəçiləri fırıldaqçılıqdan qorumaqda effektiv olduğunu bildirir.