AMB-nin sədri: "Sahəvi banklara ehtiyac yoxdur"

Azərbaycan Mərkəzi Bankının (AMB) sədri Taleh Kazımov hazırda ölkədə konkret sahə üzrə ixtisaslaşan banklara ehtiyac olmadığını bildirib. Sədr bu məsələ ilə bağlı fikirlərini bu gün keçirdiyi mətbuat konfransında açıqlayıb. Kazımov deyib ki, mövcud bankların əksəriyyəti universal fəaliyyət göstərir.

Onun sözlərinə görə, Azərbaycanda əvvəllər aqrar sahədə bankçılıqla bağlı təcrübə mövcud olub. Lakin indi əsas məqsəd bazarda banklararası rəqabəti artırmaqdır. O, bazarda ixtisaslaşmış, yəni sahəvi banka tələbatın olmadığını düşünür. Universal bankçılıq modeli hazırda bazarın tələblərinə cavab verir.

Kazımov gələcək inkişaf perspektivləri haqqında da danışıb. Ola bilsin ki, gələcəkdə bəzi banklar öz fəaliyyətlərini müəyyən sahələrə yönəltsinlər. Məsələn, onlar ancaq ipoteka kreditləşməsi ilə məşğul olmağı hədəf götürə bilərlər. O, bu cür ixtisaslaşmanın könüllü şəkildə baş verəcəyini, lakin bu gün üçün belə banklara heç bir zərurətin olmadığını qeyd edib.