AMADA-nın təşkilatçılığı ilə narkomanlığa qarşı mübarizəyə dair dövlət proqramı əsasında dəyirmi masa keçirilib

Azərbaycan Milli Antidopinq Agentliyinin (AMADA) təşkilatçılığı ilə "Qadağan olunmuş maddələrlə mübarizədə qurumlararası əməkdaşlığın perspektivləri" mövzusunda qapalı dəyirmi masa keçirilib. Bu tədbir Prezident İlham Əliyevin 2025-ci il 17 sentyabr tarixli Sərəncamı ilə təsdiq edilən "Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025–2030-cu illər üçün Dövlət Proqramı" çərçivəsində baş tutdu.

Dəyirmi masada dövlət rəsmiləri, hüquq-mühafizə orqanlarının nümayəndələri, Ümumdünya Antidopinq Agentliyinin (WADA) və müxtəlif ölkələrin antidopinq təşkilatlarının rəhbərləri, həmçinin beynəlxalq ekspertlər iştirak edirdilər. Azərbaycan Respublikasının Gənclər və İdman Nazirliyinin İdman şöbəsinin müdiri Elnur Məmmədov çıxışı zamanı qadağan olunmuş maddələrlə mübarizədə institusional əməkdaşlığın güclənməsinin vacibliyini xüsusi vurğuladı. O bildirdi ki, bu tədbir dövlət qurumları, hüquq-mühafizə orqanları və beynəlxalq tərəfdaşlar arasında əlaqələrin və məlumat mübadiləsinin daha da güclənməsinə şərait yaradır. Səmərəli antidopinq əməkdaşlığı idmanda ədaləti qorumaqla yanaşı, cəmiyyətin sağlam həyat tərzinə təşviq edilməsində əsas rol oynayır.

AMADA-nın İcraçı direktoru Təhminə Tağı-zadə isə dəyirmi masanın ölkədə antidopinq sisteminin dayanıqlı və effektiv olmasına mühüm töhfə verəcəyini qeyd etdi. O vurğuladı ki, Dövlət Proqramından irəli gələn məsələlər dövlət qurumları, hüquq-mühafizə strukturları və beynəlxalq antidopinq təsisatları arasında yeni əməkdaşlıq mərhələsinə keçid üçün böyük əhəmiyyət daşıyır. AMADA məlumat və təhqiqat mübadiləsinin genişləndirilməsi, risklərin proaktiv idarə edilməsi, eləcə də qarşılıqlı etimada əsaslanan əməkdaşlığın möhkəmləndirilməsi istiqamətində işini davam etdirəcək.

Dəyirmi masanın beynəlxalq hissəsində WADA-nın Təhqiqat şöbəsinin rəhbəri Mathieu Holz, Almaniya Milli Antidopinq Agentliyinin İcraiyyə Şurasının sədri Lars Mortsiefer, Polşa Antidopinq Agentliyinin direktor müavini Hubert Dziudzik və "Sportradar"ın Risk və təhqiqatlar şöbəsinin baş meneceri Niall Murphy kimi nümayəndələr çıxış etdilər. Onlar beynəlxalq təcrübələr, ali antidopinq qurumunun yerli hüquq-mühafizə orqanları və hökumətlərlə əməkdaşlıq mexanizmləri barədə fikirlərini bölüşdülər. Müzakirələr zamanı narkotik maddələrin qanunsuz dövriyyəsinin qarşısının alınması və gənclərin zərərli təsirlərdən qorunması üçün maarifləndirmə işlərinin gücləndirilməsi zərurəti xüsusi önəm daşıyırdı. Beynəlxalq təcrübə mübadiləsinin artırılması və beynəlxalq antidopinq təhsil mərkəzinin yaradılması kimi mövzulara toxunuldu. Tədbirin sonunda tərəfdaşlığın inkişafı, testlərin gücləndirilməsi və təmiz idmanın təşviqi ilə bağlı fikir mübadiləsi aparıldı, AMADA-nın aidiyyəti dövlət qurumları ilə əməkdaşlığını daha da genişləndirməsinin vacibliyi bir daha vurğulandı.