Alimlər 1-ci tip diabetin müalicəsində mühüm nailiyyətlər əldə ediblər

Stanford Tibb Məktəbinin tədqiqatçıları 1-ci tip diabetin müalicəsində böyük bir nailiyyətə imza atıblar. Onlar hematopoetik kök hüceyrə və mədəaltı vəzi hüceyrələrinin transplantasiyasını birləşdirərək siçanlarda xəstəliyin tam qarşısını ala və ya onu müalicə edə biliblər.

Bu metodu tətbiq etmək üçün tədqiqatçılar yumşaq bir rejim hazırladılar. Bu rejim antikorlar, aşağı dozalı radiasiya və avtoimmun xəstəliyə qarşı dərmanın birləşməsindən ibarətdir. Bu sxem artıq tibbi klinikada qismən istifadə olunur. Bu vəziyyət texnologiyanın insanlar üzərinə keçmə ehtimalını xeyli artırır. Nəticədə, həm donordan, həm də resipientdən gələn hüceyrələrdən formalaşan yeni immun sistemi yarandı. Bu sistem insulin istehsal edən hüceyrələrə yönələn avtoimmun hücumu dayandırdı. Bu cür müalicədən sonra normal şəkər səviyyəsi sabit şəkildə bərpa olundu. Ən əhəmiyyətli cəhət isə bu bərpanın əlavə insulin və immun sistemini zəiflədən preparatlar olmadan əldə edilməsidir. Tədqiqat zamanı bu metod 19 heyvanda diabetin inkişafının qarşısını aldı, xəstəliyin artıq ağır formasından əziyyət çəkən 9 heyvanda isə müsbət irəliləyiş əldə olundu.

Alimlərin fikrincə, immun sisteminin bu şəkildə "yenidən işə salınması" üsulu çox geniş tətbiq sahəsinə malikdir. Növbəti addım bu texnologiyanı insanlar üçün uyğunlaşdırmaq və transplantasiya üçün kafi miqdarda mədəaltı vəzi hüceyrələrinin mənbəyini tapmaqdır. Tədqiqatçılar hesab edirlər ki, bu, yalnız 1-ci tip diabetin müalicəsində deyil, həm də fərqli avtoimmun xəstəliklərin müalicəsində böyük sıçrayış yarada bilər. O, həmçinin qismən uyğun gəlməyən donorlardan orqanların təhlükəsiz transplantasiyasına da yol açacaq.