Albaniya Milli Kitabxanasında Azərbaycan Ədəbiyyatı bölməsi yaradılıb

Albaniyanın paytaxtı Tiranada yerləşən Albaniya Milli Kitabxanasında Azərbaycan Ədəbiyyatı bölməsinin açılış mərasimi keçirilib. Bu yeni mədəniyyət ocağı iki ölkə arasında əlaqələri gücləndirməyi hədəfleyir. Azərbaycan Milli Kitabxanasından verilən məlumata görə, açılış Albaniya və Azərbaycanın mədəniyyət sahəsindəki əməkdaşlığının yeni bir mərhələsi sayılır.

Albaniya Milli Kitabxanasının direktoru Piro Mişa mərasimdə çıxış edib. O, Albaniya ilə Azərbaycan arasında mədəni əməkdaşlığın son illərdə xeyli inkişaf etdiyini vurğulayıb. Mişa bildirib ki, Albaniya Milli Kitabxanasında yaradılan bu yeni bölmə iki ölkə arasında dostluq və mədəni əlaqələrin daha da möhkəmlənməsinə xidmət edir. Piro Mişa əlavə edib ki, bu bölmə yalnız kitab kolleksiyası deyil, həm də xalqlar arasında birbaşa mənəvi və intellektual körpü rolunu oynayır.

Piro Mişa gələcək planlar barədə də danışıb. O qeyd edib ki, Albaniya Milli Kitabxanası növbəti dövrlərdə Azərbaycan ədəbiyyatı ilə bağlı müxtəlif tədbirlər və oxu günləri təşkil etməyi nəzərdə tutur. Eyni zamanda, iki ölkənin yazıçılarının və alimlərinin mübadiləsini davam etdirmək də planlar sırasındadır. Azərbaycan Milli Kitabxanasının direktoru, professor Kərim Tahirov da çıxış edərək bu bölmənin Azərbaycan ədəbiyyatının zənginliyini və fərqliliyini nümayiş etdirmək baxımından vacib olduğunu bildirib. O, bu bölmənin Albaniya oxucuları üçün Azərbaycan mədəniyyətinə və tarixinə açılan bir pəncərə olduğunu söylədi. Tədbir iştirakçıları yeni bölmə ilə tanış oldular, burada nümayiş olunan Azərbaycan nəşrləri və kitabları ilə maraqlandılar.