AKB regionlar üzrə kredit skorlarının analizini təqdim edəcək yeni modul hazırlayır

Azərbaycan Kredit Bürosu (AKB) ölkənin regionları üzrə kredit skorlarının təhlilini təqdim edəcək yeni bir modul üzərində işləyir. Bu barədə məlumatı AKB-nin Məhsul rəhbəri Rasim Həbibzadə Bakıda keçirilən IX Beynəlxalq Bankçılıq Forumunun ikinci günündə açıqlayıb. O qeyd edib ki, büro hazırda "regionlar üzrə analiz" adlanan yeni proqramın hazırlanmasına diqqət ayırıb.

AKB bu modulun cari ilin sonuna kimi istifadəyə verilməsini planlaşdırır. Yeni vasitə istifadəçilərə portfellərindəki yeni kreditlərin orta skorlarını ölkənin fərqli regionları üzrə dəqiqləşdirməyə imkan yaradacaq. Rasim Həbibzadənin sözlərinə görə, bu modul maliyyə qurumlarına hər bir regionda verilmiş kreditlərin skor dinamikasını müəyyən dövrlər üzrə təhlil etməyə şərait yaradacaq. Bu, bankların regionlar səviyyəsində risk qiymətləndirmələrini daha dəqiq aparmasına kömək edəcək.