Aİ-nin yeni səfiri Qarabağ və Şərqi Zəngəzurdakı mina problemi barədə məlumatlandırılıb

Avropa İttifaqının (Aİ) Azərbaycandakı nümayəndəliyinin yeni rəhbəri, səfir Mariyana Kuyundziç Qarabağ və Şərqi Zəngəzurda mövcud mina problemi haqqında ətraflı məlumat alıb. Azərbaycan Respublikası Minatəmizləmə Agentliyindən (ANAMA) verilən məlumata görə, yeni səfir Agentliyin İdarə Heyətinin sədri Vüqar Süleymanovla görüş keçirib. Görüşdə humanitar minatəmizləmə sahəsində görülən işlər və bu sahədə əməkdaşlığın gücləndirilməsi perspektivləri müzakirə edilib.

Görüşdə mina probleminin miqyası və ərazilərin çirklənmə vəziyyəti ətraflı izah edilib. Qeyd olunub ki, bu ciddi çirklənmə bərpa-yenidənqurma işlərinə və keçmiş məcburi köçkünlərin öz doğma yurdlarına təhlükəsiz qayıdışına böyük maneələr törədir. Nümayəndə heyətinə həmçinin hazırda icra edilən genişmiqyaslı minatəmizləmə fəaliyyəti barədə də məlumat verilib. Agentlik bu ərazilərin tez bir zamanda təmizlənməsi üçün böyük səylər göstərir.

Müzakirələr zamanı Azərbaycanda həyata keçirilən humanitar minatəmizləmə fəaliyyətinə Avropa İttifaqı tərəfindən dəstəyin davam etdirilməsi məsələsi xüsusi diqqət çəkib. Tərəflər bu çərçivədə yeni layihə imkanları, habelə qarşılıqlı maraq doğuran digər məsələlər ətrafında fikir mübadiləsi aparıblar. Bu görüş Aİ və ANAMA arasında mina riskinin azaldılması yönündə gələcək əməkdaşlıq üçün zəmin yaradır.