Ağdamda dəfn edilmiş şəxsin məzar daşı Xocavənddə aşkarlanıb

Xocavənd rayonu ərazisində maraqlı bir tapıntı qeydə alınıb. Ağdam rayonunun Saybalı kənd qəbiristanlığında 1988-ci ildə dəfn edilmiş şəxsin məzar daşı bu rayondan uzaqda, Xocavənddə aşkar edildi. Bu fakt işğal dövründə Azərbaycanın mədəniyyət abidələrinə və qəbiristanlıqlarına qarşı törədilən hörmətsizliyin miqyasını bir daha ortaya qoyur.

Həmin məzar daşı Quliyev Məmməd Əmir oğluna məxsusdur. Daş Xocavənd rayonunun Xanoba kəndi ərazisində, bərpa və tikinti işləri aparan işçilər tərəfindən tapılıb. Ailə üzvləri hadisədən dərhal xəbərdar olublar. Mərhumun oğlu daşı götürərək onu Ağdamdakı dəfn olunduğu yerə geri gətirib.

İşğaldan azad edilmiş ərazilərdə azərbaycanlılara aid məzar daşlarından tikinti materialı kimi geniş şəkildə sui-istifadə olunurdu. Bu daşlar küçələrdə döşəmə və ya evlərin həyətində hörgü işləri üçün istifadə edilirdi. Ərazidə başqa məzar daşlarının da olduğu deyilir. Bu tapıntılar regionun qəbiristanlıqlarına vurulmuş ağır ziyanın yalnız bir hissəsidir.