ABŞ-də davam edən şatdaun ölkə tarixində ən uzun müddətli hökumət fəaliyyətsizliyi olub

ABŞ federal hökumətinin qismən fəaliyyətini dayandırması (şatdaun) ölkə tarixində indiyə qədər görülməmiş bir vəziyyət yaratdı. 1 oktyabr gecə yarısından başlayan bu fasilə, artıq ABŞ-nin fəaliyyətsizlik üzrə ən uzunmüddətli rekordu oldu. O, Donald Trampın ilk prezidentlik dövründə (2017-2021) 2018-2019-cu illərdə qeydə alınan əvvəlki rekordunu təzələyib. Məlumatlara görə, 4 noyabr saat 20:24-ə (Bakı vaxtı ilə 5 noyabr 05:24) qədər federal hökumətin işinin bərpası üçün maliyyələşdirmə ayırmağa imkan verəcək qanun layihəsi hələ də Konqres tərəfindən razılaşdırılmayıb. Birləşmiş Ştatlar noyabrın 2-də qış vaxtına keçib, lakin şatdaun fasiləsiz davam edir.

Bu fəaliyyətsizlik artıq 34 gün, 21 saat və 24 dəqiqədir ki, davam edir. Beləliklə, bu, Birləşmiş Ştatlar tarixinin ən uzunmüddətli şatdaunu kimi qeydə alınıb. Əvvəlki rekord 2018-ci il dekabrın 22-si gecə yarısı başlamışdı və 2019-cu il yanvarın 25-də, 35-ci gündə aradan qaldırılmışdı. Həmin vaxt Konqresin hər iki palatasında səsvermədən sonra Ağ Ev Trampın müvafiq qanunu ABŞ-nin şərq sahili vaxtı ilə saat 21:23-də imzaladığını bildirmişdi. O zaman hökumətin fəaliyyətinin dayandırılması ümumilikdə 34 gün, 21 saat, 23 dəqiqə davam etmişdi.

Problemin həll olunmamasının əsas səbəbi Konqresdəki siyasi gərginlikdir. Bu yaxınlarda ABŞ Konqresinin Senatı Respublikaçılar Partiyası tərəfindən federal hökumətin işinin maliyyələşdirilməsini təmin etmək haqqında təklif edilən qanun layihəsini rədd etdi. Bu, son bir neçə həftə ərzində bu layihənin rədd edilməsinin 14-cü halı idi. Bu cür ardıcıl uğursuzluq hökumətin ən qısa zamanda fəaliyyətə başlamasına imkan verən maliyyələşdirmə qərarının qəbulunu çətinləşdirir. Nəticədə, ABŞ federal idarələri fəaliyyətini bərpa etmək üçün qanunvericilik razılaşmasını gözləyir.