ABŞ-da Nümayəndələr Palatası şatdaunun ləğvi ilə bağlı layihəni təsdiqləyib

ABŞ-da 43 gün davam edən şatdaun nəhayət bu gün başa çatır. Hökumətin fəaliyyəti bərpa olunur, çünki Konqres müvəqqəti maliyyələşmə planını təsdiqləyib. Nümayəndələr Palatası hökumətin yanvarın 30-na qədər maliyyələşdirilməsini nəzərdə tutan qanun layihəsini səsverməyə çıxardı. Bu addım bütün ölkə üzrə yüz minlərlə dövlət işçisinin əmək haqqını almasına imkan verəcək.

Qanun layihəsi Palatada 222 lehinə, 209 əleyhinə səslə təsdiqlənib. Səsvermə nəticələri həm partiya daxilində, həm də partiyalar arasında fikir ayrılığının olduğunu göstərir. Demokratlar Partiyasının 6 üzvü bu qanunun lehinə səs verərkən, Respublikaçılar Partiyasından 2 nümayəndə əleyhinə çıxış etdi. Bu, 43 gün davam edən şatdaun müddətində yaranan böhranın həllinə doğru atılan mühüm addım idi.

Qanun layihəsi Senat tərəfindən artıq təsdiqlənmişdi. Növbəti və sonuncu mərhələ isə ABŞ Prezidentinin imzalanmasıdır. Şatdaun yalnız Donald Trampın imzalaması ilə tamamilə dayandırılacaq. Prezidentin bu sənədi yaxın saatlarda imzalaması gözlənilir, bununla da hökumətin maliyyə dayanıqlığı müvəqqəti olaraq təmin olunacaq.