Abbas Əraqçi: İranın nüvə probleminin hərbi həlli yoxdur

İranın xarici işlər naziri Abbas Əraqçi bildirib ki, İranın nüvə problemi üçün hər hansı bir hərbi həll yolu mövcud deyil. O, beynəlxalq konfransda çıxış edərkən, bu məsələdə konsensusa yalnız diplomatiya və ədalətli danışıqlar vasitəsilə nail oluna biləcəyini qeyd edib. Nazir vurğulayıb ki, danışıqlar zamanı tərəflərdən heç biri öz şərtlərini diktə etməyə çalışmamalıdır.

Əraqçinin sözlərinə görə, Tehran həmişə danışıqlara hazır olduğunu nümayiş etdirib. Lakin bu danışıqlar, döyüş meydanında əldə olunmayan məqsədləri zorla qəbul etdirmək üçün bir vasitə kimi istifadə edilməməlidir. O əlavə edib ki, danışıqlarda kompromis və qarşılıqlı fayda olmalıdır. Bir tərəfin istədiyi hər şeyi tam şəkildə əldə etməsi mümkün deyil. İran heç vaxt nüvə texnologiyalarının inkişafı və uranın zənginləşdirilməsi hüququndan imtina etməyəcək.

Xarici İşlər Nazirinin qeyd etdiyi kimi, sülh məqsədli nüvə texnologiyalarının inkişafı, o cümlədən zənginləşdirmə prosesi, İran xalqının ayrılmaz hüququdur. Bu hüquq Nüvə Silahlarının Yayılmaması Müqaviləsinin 4-cü maddəsində təsbit olunub. Əraqçi Tehranın indi 12 günlük müharibə (İsraillə) dövründən daha güclü olduğunu bəyan edib. O, ABŞ və İsrailin İranın nüvə proqramını məhv etmək cəhdlərinin uğursuzluqla nəticələndiyini bildirib. Nazir, İsrailin ABŞ-nin dəstəyi ilə öz geosiyasi ambisiyalarını həyata keçirdiyini və beynəlxalq hüququn əsaslarını pozduğunu vurğulayıb. O, Vaşinqtonun dağıdıcı siyasət yeritdiyini və güc mövqeyindən Tehrana öz şərtlərini diktə etməyə çalışdığını əlavə edib.