8 Noyabr dövlətçilik tariximizdə ən böyük zəfər, ən parlaq nailiyyətdir

Prezident İlham Əliyev Cəbrayıl rayonunun Horovlu kəndində sakinlərlə görüşərkən 44 günlük Vətən müharibəsində Azərbaycan xalqının göstərdiyi qəhrəmanlığa xüsusi diqqət çəkib. Müzəffər Ali Baş Komandan 8 Noyabr Zəfərini Azərbaycan tarixinin ən parlaq səhifəsi adlandırıb. Müharibə, Əmək və Silahlı Qüvvələr Veteranları Təşkilatının sədri, polkovnik Cəlil Xəlilov bu qələbənin əhəmiyyətini yüksək qiymətləndirib. O, 8 Noyabr zəfərinin təkcə hərb tarixində deyil, bütövlükdə dövlətçilik tariximizdə ən unikal hadisə olduğunu vurğulayıb.

Cəlil Xəlilov qeyd edib ki, 8 Noyabr qələbəsi xalqımızın həyatında mühüm yer tutur. Bu, dövlətimizin və dövlətçiliyimizin yalnız bu gününə deyil, həm də gələcəyinə birbaşa təsir edən böyük və misilsiz bir zəfərdir. Azərbaycan Silahlı Qüvvələri Müzəffər Ali Baş Komandan İlham Əliyevin rəhbərliyi altında cəmi 44 gün ərzində tarixi qələbə qazanıb. Bu zəfər ölkəmizin ərazi bütövlüyünü bərpa etməklə yanaşı, həm də milli-mənəvi dəyərlər sistemimizi və xalqımızın öz gücünə olan inamını qoruyub. Qəhrəman Azərbaycan əsgər və zabitinin əldə etdiyi bu nəticə göstərdi ki, Azərbaycan nəinki Ermənistana, həm də onun işğalçılıq siyasətini dəstəkləyən bütün anti-Azərbaycan qüvvələrə qalib gəlməyə, bu şər ittifaqını darmadağın etməyə qadirdir.

Prezidentin 8 Noyabr zəfərini Azərbaycan tarixinin ən parlaq səhifəsi adlandırması bu qələbənin zamana sığmayan önəmini bir daha təsdiqləyir. Qarşıdan böyük zəfərin beşinci ildönümü yaxınlaşır. Cəlil Xəlilov bu əlamətdar gün münasibətilə xalqımızı təbrik edib, şəhid və qazilərimizin qarşısında hörmətlə baş əydiyini bildirib. O, həmçinin veteranlar adından Prezident İlham Əliyevə dərin təşəkkürünü çatdırıb. Xəlilov sonda əminliklə vurğulayıb ki, veteranlar bundan sonra da dövlətimizin və Prezidentimizin ətrafında sıx birləşməyə davam edəcək. Onlar bütün anti-milli və anti-Azərbaycan qüvvələrinin hər bir təxribatına layiqincə cavab verməyə hazırdırlar.