44 günlük müharibənin bitməsindən indiyədək 412 nəfər mina partlayışlarının qurbanı olub – XİN

Qazaxın Bala Cəfərli kəndi ərazisində Azərbaycan Respublikasının Minatəmizləmə Agentliyinin (ANAMA) əməkdaşı Samir Mübariz oğlu İmamverdiyev xidməti vəzifəsini yerinə yetirərkən piyada əleyhinə mina partlayışı baş verdi. 1988-ci il təvəllüdlü əməkdaş hadisə nəticəsində ağır xəsarət aldı; onun sağ ayağı topuq nahiyəsindən amputasiya edildi. Xarici İşlər Nazirliyi (XİN) bu hadisə ilə bağlı “X” hesabında paylaşım edərək mina təhlükəsinin hələ də Azərbaycanda insanların həyatına son qoymağa davam etdiyini bildirdi. Bu gün ANAMA-nın əməkdaşı Ermənistan sərhədində mina partlayışı nəticəsində ağır yaralanıb.

XİN qeyd edib ki, təkcə 2020-ci ilin 44 günlük müharibəsinin bitməsindən bu yana 412 nəfər mina partlayışlarının qurbanı olub. Nazirlik bu vəziyyəti humanitar faciə adlandırır. Bu faciə mülki şəxsləri hədəfə alır, bərpa işlərinə mane olur və təhlükəsiz qayıdışı əngəlləyir. XİN hesab edir ki, bu, beynəlxalq humanitar hüququn ciddi şəkildə pozulmasıdır. Mina təhlükəsi ilə bağlı vəziyyət göstərir ki, bölgədə mülki əhalinin təhlükəsizliyi hələ də ciddi risk altındadır.

Baş verən bu son hadisə genişmiqyaslı minatəmizləmə əməliyyatları üçün olan təcili ehtiyacı bir daha göstərir. Paylaşımda qeyd olunub ki, ölkə bu əməliyyatları sürətləndirmək və müvəffəqiyyətlə başa çatdırmaq üçün beynəlxalq dəstəyə ehtiyac duyur.