230 mindən çox şəxs peşəyönümü məsləhət xidmətləri ilə əhatə olunacaq

2026-cı ildə işsiz və işaxtaran şəxslərin əmək bazarına daxil olması gücləndiriləcək. Əmək və Əhalinin Sosial Müdafiəsi Naziri Anar Əliyev Milli Məclisdə "Dövlət Sosial Müdafiə Fondunun 2026-cı il büdcəsi haqqında" qanun layihələrinin müzakirəsi zamanı bu barədə məlumat verdi. Nazir peşə hazırlığı və əlavə təhsil imkanlarını genişləndirmək məqsədilə 17500-ə yaxın müdavimin bu prosesə cəlb edilməsinin planlaşdırıldığını bildirdi. Bu təlimlər həm Dövlət Məşğulluq Agentliyinin tabeliyində fəaliyyət göstərən peşə hazırlığı mərkəzləri, həm də özəl tədris müəssisələri tərəfindən həyata keçiriləcək. Hazırda ümumilikdə 175 ixtisas üzrə peşə hazırlığı kursları təşkil edilir. Bu təşəbbüslər ölkədə məşğulluq səviyyəsini yüksəltməyə və işsizliyin qarşısını almağa hesablanıb.

Təhsil və kvalifikasiya səviyyəsinin aktuallığını qorumaq üçün 2026-cı ildə ciddi addımlar atılacaq. Plana görə, 100 yeni peşə və kvalifikasiya standartının hazırlanması və mövcud olan 135 peşə və kvalifikasiya standartının yenilənməsi həyata keçiriləcək. Nazirlik həmçinin işsiz şəxslərin əmək bazarına daxil olmasını maliyyə cəhətdən dəstəkləyir. Bunun üçün işəgötürənlərlə birlikdə əməkhaqqının birgə maliyyələşdirilməsi mexanizmi genişləndiriləcək. Bu proqram çərçivəsində gələn il mindən artıq iştirakçının əmək bazarına cəlb olunması nəzərdə tutulub. Bu mexanizm işaxtaranların daha tez işlə təmin olunmasına kömək edir.

Əhalinin əmək bazarına inteqrasiyasını təmin etmək üçün təşkil edilən tədbirlər arasında peşəyönümü xidmətləri mühüm yer tutur. Növbəti il bu xidmətlərlə əhatə olunacaq şəxslərin sayı 230 mindən çox olacaq. Peşəyönümü məsləhət xidmətləri tələbə və şagirdlərə, onların valideynlərinə, işaxtaran və işsiz şəxslərə yönəlib. Bu dəstəyin məqsədi, fərdlərin təhsillərinə, bacarıqlarına və şəxsi keyfiyyətlərinə uyğun olaraq ixtisas seçiminə, peşə maraqlarının formalaşdırılmasına və karyera hədəflərinin müəyyənləşdirilməsinə kömək etməkdir. Həmçinin, işədüzəlmə prosesini sürətləndirmək üçün ölkə üzrə ümumilikdə 180 əmək yarmarkasının keçirilməsi planlaşdırılıb.