2030-cu ilə qədər smartfonlar süni intellekt tərəfindən əvəz olunacaq - İlon Mask

Amerikalı milyarder İlon Mask texnologiya sahəsində gözlənilməz proqnozla çıxış edib. O, yaxın on il ərzində smartfonların tamamilə yox olacağını və onların yerini süni intellekt (Sİ) əsaslı cihazların tutacağını bildirib. Maskın fikrincə, bu böyük texnoloji dəyişiklik 2030-cu ilə qədər baş verəcək.

Sahibkar bu fikri teleaparıcı Co Roqanın verilişində səsləndirib. Mask hesab edir ki, smartfonların yoxa çıxması ilə yanaşı, bu cihazların indiki işləmə sistemləri də tarixdə qalacaq. Yəni, 2030-cu ilə kimi ənənəvi əməliyyat sistemləri və tətbiqlər (app-lər) artıq istifadə edilməyəcək. Əvəzində, istifadəçilər Sİ funksiyaları ilə təchiz edilmiş, ekran və səs əsasında işləyən qurğulara keçid edəcəklər. Bu keçid insanların cihazlarla qarşılıqlı əlaqəsinin keyfiyyətini kökündən dəyişəcək. Artıq bir neçə klik etmək əvəzinə, bizimlə birbaşa danışan və ehtiyaclarımızı anlayan avadanlıqlar önə çıxacaq.

Mask gələcək süni intellektin bacarıqlarını xüsusilə vurğulayıb. Onun sözlərinə görə, bu yeni nəsil Sİ, sadəcə verilən əmrlərə cavab verməklə məhdudlaşmayacaq. Gələcəyin Sİ-i insan istəklərini əvvəlcədən anlamaq və bu istəklərə uyğun reaksiya vermək qabiliyyətinə malik olacaq. Bu o deməkdir ki, istifadəçilər hər hansı bir əməliyyat üçün cihaza müraciət etməzdən əvvəl, Sİ onların növbəti addımını proqnozlaşdıra biləcək. İlon Maskın bu proqnozu göstərir ki, mobil texnologiyalar dövrü bitmək üzrədir və yerini daha intuitiv və ağıllı cihazlar tutacaq.